Aktivitete klase për inteligjencat e shumëfishta

Për çfarë jemi inteligjent?

March 15, 2021

Si të aplikojmë tre fushat e të nxënit në klasë?

March 16, 2021

Published by Art Mësimi

Tags

Inteligjencat e Shumëfishta

Studiuesi i psikologjisë së edukimit në Universitetin e Harvardit, H. Gardner, në vitin 1983 formuloi teorinë e tij lidhur me inteligjencën, të cilën e emërtoi Teoria e Inteligjencave të Shumëfishta (Theory of Multiple Intelligences). Me këtë teori në vend të testeve psikometrike, siç është IQ, Dr. Howard Gardner propozonte inteligjenca të ndryshme që të japin një gamë më të gjerë të potencialit njerëzor, tek fëmijët dhe të rriturit. Këto inteligjenca janë:

Inteligjenca gjuhësore
Inteligjenca logjike-matematikore
Inteligjenca hapësinore
Inteligjenca trupore-kinestetike
Inteligjenca ritmike
Inteligjencës ndërpersonale
Inteligjenca intrapersonal
Inteligjenca natyrore.

Disa aktivitete klase që përkojnë me inteligjencat e shumëfishta

Mësimdhënësit shpesh janë para një dileme gjatë planifikimit mësimor; çfarë aktivitetesh të përzgjedh për këtë klasë apo për këtë grup nxënësish në mënyrë që t’i aktivizoj maksimalisht nxënësit në mësim?

Një formë e përshtatjes së aktiviteteve për nxënës është njohja e inteligjencave të tyre. Pra, qëllimi i identifikimit të inteligjencave të shumëfishta për mësimdhënësin (kujdestarin, mësuesen/in e klasës etj.) është që nxënësve t’u përshtat aktivitetet mësimore sipas inteligjencave dominuese në klasë. Secili nxënës është i veçantë, prandaj secili ka qasje të mësuarit ndryshe nga të tjerët, bazuar në inteligjencat e theksuara të tij/saj, interesat, qëndrimet për mësimin. Nxënësit të cilët posedojnë inteligjenca të njejta mund të grupohen dhe të përshtaten aktivitetet sipas grupeve. Kështu secili nxënës participon në aktivitetet relevante për të.

Aktivitetet verbale/gjuhësore

Nxënësit me inteligjencë të lartë verbale/linguistike janë të shkathtë në të shkruar dhe në të folur. Prandaj për këtë grup nxënësish propozohen aktivitete si:

Aplikimi i tregimeve dhe rrëfimeve
Shkrimi i tregimeve
Improvizimi i emisioneve të radios apo televizionit
Krijimi i artikujve të gazetave, revistave, portaleve etj.
Organizimi i debateve, intervistave, bisedave.
Lojërat me fjalorë.
Formimi i materialeve reklamuese për biznese të sajuara
Aplikimi i podcast (a digital audio file) në klasë[1].

Aktivitete matematike / logjike

Nxënësit që kanë inteligjencë matematike / logjike janë mendimtarë logjikë që kënaqen në njohjen e problemeve. Aktivitetet në klasë që përkojnë me këtë lloj të inteligjencës përfshijnë:

Zgjidhja e problemeve duke përdorur arsyetimin deduktiv
Parashikimi i rezultateve në bazë të rrethanave të mësimit
Aplikimi i lojërave logjike
Bërja e “planifikimit financiar”për një biznes imagjinar.

Aktivitete hapësinore

Aktivitetet në klasë për të nxjerrë në pah inteligjencën hapësinore përfshijnë:

Gara orientimi[2]
Lexim i hartave dhe krijimi i tyre
Fjali diagramësh[3] (Paraqitja grafike e struktures gramatikore të fjalisë).
Paketimi i sendeve specifike në një çantë ose kuti në mënyrë që të përputhen (palohen) mirë.
Përdorimi i “hartave të mendjes”[4] në vend të formave tradicionale për të rikujtuar gjërat apo për të marrë shenime në klasë.

Aktivitete ritmike

Shkruani dhe recitoni poezi
Kryeni rutinat e vallëzimit për të prezantuar ngjarje historike ose kulturore
Shkruani përgjigjet e testeve në praninë e aktivitetit të një metronomi[5]

Aktivitetet kinestetike

Nxënësit kinestetikë e duan lëvizjen. Ata shpesh janë fëmijë shumë fizikë dhe nganjëherë atletë të talentuar. Aktivitetet për nxënësit kinestetik përfshijnë:

Ri-adoptime dramatike të ngjarjeve historike ose letrare
Përdorimin e pjesëve të ndryshme të trupit për të matur objektet
Përdorimi i “charades”(një lojë ekipore në të cilën njërit nxënës iu prezantohet një fjalë ose frazë e veçantë, ndërsa ai përpiqet t’i tregojë të tjerëve përmes gjuhës së trupit për kuptimin e fjalës së dhënë. Apo aktivitetin “password”, në të cilin, nxënësit grupohen në dy grupe (A dhe B), një nxënës nga grupi A, ulet në afërsi të tabelës i kthyer me shpinë nga tabela dhe fytyrë kah grupi i tij, mësimdhënësi shkruan një fjalë në tabelë. Grupi A, perms gjuhës së trupit, përpiqet t’i sqarojë nxënësit se çfarë fjale ka në tabelë. Nëse nxënësi në karrigë qëllon fjalën, ekipa A merr një pikë.
Mësimi i vallëzimeve popullore;

Aktivitetet të inteligjencës ndërpersonale

Nxënësit ndërpersonal janë ata fëmijë që punojnë mirë në bashkëpunim, pëlqejnë krijimin e miqësive dhe raporteve me të tjerët. Aktivitetet për të mësuar nxënës të tillë, përfshijnë:

Projekte në grupe të vogla;
Konceptet e mentorimit ose mësimdhënies midis nxënësve;
Aplkimi i intervistave;
Loja në role lidhur me situata historike apo kulturore;
Aktivitete “team building”[6] (lojra ekipore);
Simulimi i debateve si dhe kampanjave (fushatave) mediatike në klasë.

Aktivitetet Intrapersonale

Nxënësit intrapersonal janë ata që janë shumë të vetëdijshëm për motivet e tyre. Ata shpesh kanë një nivel të lartë vetëdijesimi dhe inteligjencë emocionale[7]. Aktivitetet intrapersonale në klasë përfshijnë:

Mbajtje ditari personal
Shkrimi i autobiografisë
Puna në mënyrë të pavarur
Të shkruarit e eseve për situate historike ose aktuale
Rishkrimi i tregimeve nga këndvështrimi i nxënësve
Lojë në role, ku secili fëmijë është karakteri i tij.

Aktivitete Natyrore

Natyralistët janë të dashuruar në natyrë dhe kanë interes në shkencat e natyrës. Aktivitetet për nxënësit natyralistë përfshijnë:

Kategorizimi i specieve në botën natyrore
Ekskurzionet në natyrë
Gara orientimi[8]
Krijimi i akuariumeve në klasë
Mbjellja dhe mirëmbajtja e një kopshti komuniteti
Organizimi i aktiviteteve të pastrimit të natyrës në bashkësi

Përdorimi i teorisë së 8 inteligjencave për të promovuar të nxënit

Nëse nxënësi ka vështirësi të mësojë, kjo mund të ndodhë sepse aktiviteti mësimor është i përqendruar në një fushë me të cilën nuk është relative për të. Mësimdhënësi në klasë dhe prindërit në shtëpi mund të krijojnë aktivitete që mund të ndihmojnë fëmijën që të jetë më i suksesshëm duke u zhvendosur në stilin unik të tij të të mësuarit. Ju nuk keni nevojë të mësoni në tetë mënyra njëherësh, thjesht shikoni se cilat janë mundësitë dhe pastaj vendosni se cilat rrugë të veçanta ju interesojnë (përkojnë më së tepërti me nxënës), ose duket se janë mjete më efektive për mësimdhënie ose mësim. Si mësimdhënës, është e dobishme të mendoni për mënyrat e ndryshme që mund të paraqiten dituritë në klasë, sikundër që nuk preferohet që nxënësit të klasifikohen si “tip specifik i të nxënit” pavarsisht inteligjencës së lindur apo të fituar. /ARTMESIMI.COM/

Burimet :