Zhvillimi fizik dhe shëndetësor i fëmijëve

Edukimi fizik dhe shëndetësor është proces në të cilin fëmija mëson se çfarë do të thotë të jetë në formë të mirë fizike, si të përdor informacionet, qëndrimet dhe aftësitë që ka zhvilluar për të bërë zgjedhje të shëndetshme në promovimin dhe mbajtjen e mirëqenies së tij fizike. Studjuesit dallojnë karakteristikat e mirëqenies fizike, aspektet që rrezikojnë shëndetin fizik dhe qasjet pozitive në zhvillim fizik.

Karakteristikat e fëmijëve të shëndetshëm fizikisht

• Kanë njohuri shëndetësore, që i ndihmon ata të ruajnë shëndetin dhe t’i parandalojnë sëmundjet e ndryshme.
• Zgjedhin sjellje që promovojnë shëndetin.
• Marrin pjesë në situata që prmovojnë ruajtjen e mjedisit.
• Shëndet dhe mirëqenie fizike.

Aspektet që kërcënojnë mirëqenien fizike dhe shëndetësore të fëmijëve

• Përdorimi i produkteve të duhanit
  (me tym dhe me përtypje)
• Alkooli dhe drogat
  Alkooli është një drogë psikoaktive që depresionon sistemin nervor qëndror[1] , e dëmton të menduarit dhe të gjykuarit, zvogëlon koordinimin dhe aftësinë për t’iu përgjigjur shpejt situatave të rrezikshme. Ndërsa substanca të paligjshme si marihuanë, kokainë, steroide, heroine kanë efekte shëndetësore njësoj shkatërruese. Përdorimi i tyre prishin ekuilibrin e çdo sistemi në trup dhe shpesh janë shkak i dhunës dhe sjelljeve të paparashikueshme.
• Çrregullimet e të ushqyerit
  Ushqimi i duhur konsiderohet ai që është i ekuilibruar në përdorimin e lëndëve ushqyese , i pasur me kalori të mjaftueshme, qumësht dhe fruta, që jep energji të nevojshme për punë, aktivitet fizik dhe relaksim.
•  
  Mungesa e aktiviteteve fizike
  Aktiviteti fizik ndihmon në forcimin e kockave dhe muskujve, ngrit aktivetitin dhe ul simptomat e depresionit dhe ankthit. Mungesa e tyre rezulton me pasivitet trupor, pa aftesi për të kryer punët e përditshmërisë, çekuilibrim i peshës trupore (matet sipas BMI-Body Mas Index- Indeksi i Masës Trupore)[2] .
• Infeksionet dhe sëmundjet e ndryshme të transmetueshme. Iu referohemi kryesisht sëmundjeve të transmetueshme që rezultojnë me infeksionin HIV[3].

Qasjet e arritjes së mirëqenies fizike dhe shëndetësore

Sistemi shëndetësor dhe arsimor me qëndrim proaktiv në arritjen e mirëqenies fizike të fëmijëve, ndihmojnë fëmijët  të bëjnë jetë të shëndetshme në mënyrë të vazhdueshme , përmes involvimit të mjekëve, mësuesve, prindërve, etj., në strategji të  bazuara në nevojat e intervenimit/informimit të fëmijëve për kujdes fizik.

Andaj programet e këshillimit kanë ndikim pozitiv në ngritjen e mirëqenies fizike të fëmijës duke adresuar këto fusha të kujdesit fizik:

• Rritja, zhvillimi dhe kujdesi

Kjo fushë fokusohet në edukimin e fëmijëve lidhur me disa aspekte biologjike të zhvillimit të njeriut, si : kuptimi i natyrës së gjinive, kujdesi për sistemin e tyre të trupit, gjë që bënë të kenë vetëbesim më të shtuar.

• Kujdesi nutritiv/ushqimor

  Ky dimension edukimi, këshillimi dhe rekomandimi, fokusohet në ndikimin e nutricionit-të ushqyerit në mirëqenien fizike dhe shëndetësore të fëmijës. Në këtë aspekt është i njohur “Katalogu/Udhëzuesi i Piramidës Ushqimore” : “Rekomandime për ushqyerjen e shëndetshme në Shqipëri”[4], përpiluar nga Ministria e Shëndetësisë dhe Organizata South-Eastern Europe Health Network, 2008, bazuar në hulumtimet e OBSH- së (Organizata Botërore e Shëndetësisë), apo “Këshilla dhe receta për ushqyerjen e shëndetshme të fëmijëve”, pulikuar nga SAVE THE CHILDREN (Tiranë.2017).[5]

• Kujdesi në menaxhimin e rreziqeve shëndetësore

Kjo fushë fokusohet në ndihmën e fëmijëve në parandalimin, vlerësimin, gjykimin dhe kontrollin  e çdo forme, mjeti apo situate që sfidon shëndetin fizik të tyre.

©  Platforma edukative –  artmesimi.com

© Të gjita të drejtat e rezervuara. Nuk lejohet kopjimi, shpërndarja , riprodhimi  në çfarëdo forme pa autorizimin e platformës edukative – Artmësimi.

© All rights reserved. It is not allowed to copy, distribute, reproduce in any form without the authorization of the Educational Platform – Artmësimi.

[1] Sistemin nervor qëndror e përbëjnë truri dhe palca kurrizore.

[2] Kalkulatori për PC: https://www.nhs.uk/live-well/healthy-weight/bmi-calculator/
Kalkulatori për Android (Google Play):https://play.google.com/store/apps/details?id=com.appovo.bmicalculator&hl=en_US&gl=US

3Human Imunodeficienty Virus-Virusi i mungesës së imunitetit të njeriut.

[4] http://www.ishp.gov.al/wp-content/uploads/2015/04/REKOMANDIME-P%C3%8BR-USHQYERJEN.pdf

[5] https://albania.savethechildren.net/sites/albania.savethechildren.net/files/library/Healthy%20feeding%20for%20early%20ages%20children.pdf